ប្រាសាទបេងមាលា គឺជាបុរាណប្រាសាទមួយ មានអាយុកាលរាប់រយឆ្នាំមកហើយ ដែល​បាន​លាក់​ខ្លួន​ពួនសំងំនៅក្នុងព្រៃដ៏ស្ងប់ស្ងាត់ក្បែរជើងភ្នំគូលែន ស្ថិតក្នុងភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប។ ប្រាសាទបេងមាលា ត្រូវបានស្ថាបនាឡើងនាអំឡុងចុងស.វ ទី ១១ និងដើមស.វ ទី ១២ នៃគ.ស ដោយព្រះបាទសូរ្យវរ្ម័នទី២ សាងសង់លើផៃ្ទដីទំហំ១៤ហិកតា ។

ប្រាសាទនេះក៏ត្រូវបានសាងសង់ឡើងដើម្បីឧទ្ទិសថ្វាយព្រះអាទិទេពក្នុងលទ្ធិព្រហ្មសាសនា។ ប៉ុន្តែ​បច្ចុប្បន្នប្រាសាទបេងមាលា បានក្លាយជាទីបូជនីយដ្ឋានទេសចរណ៍ប្រវត្តិសាស្រ្តដ៏ល្អវិចិត្រ ដែល​ទាក់ទាញក្រសែភ្នែកទេសចរចម្រុះជាតិសាសន៍ឱ្យចូលទៅទស្សនា។

ដើម្បី​ទៅ​ទស្សនា​ប្រាសាទ​បេងមា​លា លោកអ្នកអាចធ្វើដំណើរចេញពីក្រុងសៀមរាប មាន​រយៈ​ចំងាយ​ប្រមាណ ៥៦គីឡូម៉ែត្រ និងមានចំងាយប្រមាណ ៣១៤គីឡូម៉ែត្រពីរាជធានីភ្នំពេញ៕