ខ្មែរ 
ប្រទីបរបស់ក្រសួង ស្ថានប័ននានាកំពុងរៀបចំតុបតែងលម្អត្រៀមអបអរក្នុងព្រះរាជពិធីបុណ្យអុំទូក
ប្រទីបរបស់ក្រសួង និងស្ថាប័ននានា កំពុងរៀបចំតុបតែងលម្អត្រៀមបណ្តែតក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តិទៅ នៅខែវិច្ឆិកាខាងមុខនេះ។
គិតមកដល់ថ្ងៃទី១៧ ខែតុលានេះ ការរៀបចំតុបតែងលម្អប្រទីបរបស់ក្រសួង ស្ថាប័ននានា កំពុងមមាញឹក ដើម្បីត្រៀមបណ្តែតអបអរក្នុងព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ។ ប្រទីបដែលកំពុងរៀបចំទាំងនោះមានដូចជា៖ប្រទីបព្រឹទ្ធសភា រដ្ឋសភាព រាជដ្ឋាភិបាល ព្រះបរមរាជវាំង ក្រសួងមហាផ្ទៃ ក្រសួងការពារជាតិ ក្រសួងយុត្តិធម៌ ក្រសួងទេសចរណ៍ ក្រសួងពាណិជ្ជកម្ម និងរដ្ឋបាលរាជធានីភ្នំពេញជាដើម។
បើតាមការលើកឡើងរបស់យុវជនបានប្រាប់BTVឱ្យដឹងថា នៅឆ្នាំនេះ នឹងចូលព្រះពិធីបុណ្យអុំទូកនៅមុខព្រះបរមរាជវាំង មើលការប្រណាំងទូក អុជកាំជ្រួច បណ្តែតប្រទីប និងដើរទស្សនាស្តង់តាំងពិព័រណ៍ផ្សេងៗ។
ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រព្រឹត្តិទៅ ក្នុងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៤។ ជាទម្លាប់ ពិធីបុណ្យអុំទូកខុសប្លែកពីពិធីបុណ្យនានា ដែលប្រជាពលរដ្ឋខ្មែរភាគច្រើនធ្វើដំណើរចាកចេញពីរាជធានីភ្នំពេញឆ្ពោះទៅស្រុកកំណើត ឬតំបន់កំសាន្តនានា រីឯព្រះរាជពិធីនេះវិញ គឺប្រជាពលរដ្ឋខ្មែរភាគច្រើនបាននាំគ្នាធ្វើដំណើរពីខេត្តនានា មកទស្សនាការប្រណាំងទូកនៅរាជធានីភ្នំពេញ។
គួរំលឹកដែរថា ព្រះរាជពិធីបុណ្យអុំទូក ត្រូវបានប្រារព្ធធ្វើឡើងតាំងពីសម័យបុរាណមកម៉្លេះ ក្នុងគោលបំណងរំលឹកដល់គំរូវីរភាពដ៏អង់អាចក្លាហានរបស់កងទ័ពជើងទឹកខ្មែរ ដែលដឹកនាំដោយព្រះបាទជ័យវរ្ម័នទី៧ រំដោះទឹកដីរួចផុតពីការជិះជាន់របស់ពួកខ្មាំងសត្រូវ (ចាម) ដែលបានចូលមកឈ្លានពានត្រួតត្រាខ្មែរអស់រយៈពេល៤ឆ្នាំ ពោលនៅ គ.ស.១១៧៧–១១៨១។ ជាភស្តុតាងនៃរឿងចម្បាំងក្នុងគ្រានោះ មានឆ្លាក់នៅលើជញ្ជាំងប្រាសាទបាយ័ន និងប្រាសាទបន្ទាយឆ្មារ ដោយបានឆ្លាក់រូបភាពកងទ័ពទូកជាច្រើនមហិមា និងមានព្រះឆាយាលក្ខ័នៃព្រះបាទជ័យវរ្ម័នទី៧ ប្រថាប់ឈរលើទីតាំងនាវាចម្បាំង ដោយទ្រង់ធ្នូនិងដំបងយ៉ាងស្វាហាប់ ក្នុងចំណោមទ័ពទូកទាំងឡាយ៕