ការប្រកួតបាល់ទាត់អន្តរជាតិ AFC Challenge League វគ្គផ្តាច់ព្រ័ត្រ នៅពហុកីឡដ្ឋានជាតិមរតកតេជោ នឹងចាប់ផ្តើមនៅម៉ោង៧យប់ ថ្ងៃទី១០ ខែឧសភានេះ​។​ ដើម្បីនូវសុវត្ថិភាព សន្តិសុខ សណ្តាប់ធ្នាប់ ​នៃការប្រកួតនេះ រដ្ឋបាលខណ្ឌជ្រាយចង្វារ ប្រកាសហាមសកម្មភាពបង្ហោះដ្រូន  និងសកម្មភាពផ្សេងៗនៅលើអាកាសដោយគ្មានការអនុញ្ញាត ក្នុងតំបន់ជុំវិញបរិវេណពហុកីឡដ្ឋានជាតិមរតកតេជោ។​

ហាមដាច់ខាតមិនអនុញ្ញាតឱ្យមានការបង្ហោះដ្រូន បង្ហោះខ្លែង បង្ហោះគោម បង្ហោះប៉េងប៉ោង បាញ់កាំជ្រួច ការបាញ់ភ្លើងហ្វា ឬភ្លើងឡាស៊ែរបញ្ចាំងឡើងលើ ដោយគ្មានការអនុញ្ញាតនៅក្នុងតំបន់ជុំវិញបរិវេណពហុកីឡដ្ឋានជាតិមរតកតេជោ រហូតដល់កម្មវិធីប្រកួតចប់សព្វគ្រប់»។  នេះជាការបញ្ជាក់របស់រដ្ឋបាលខណ្ឌជ្រាយចង្វារ​ រាជធានីភ្នំពេញ​ នាថ្ងៃទី៩​ ខែឧសភា។​

ក្នុងករណីពលរដ្ឋមិនគោរពតាមការណែនាំនេះ រដ្ឋបាលខណ្ឌ នឹងចាត់វិធានការចុះដកហូតឧបករណ៍ ឬសម្ភារៈទាំងនោះ ដោយមិនទទួលខុសត្រូវ ចំពោះការខូចខាត ឬបាត់បង់សម្ភារៈ និងផលប្រយោជន៍របស់អ្នកប្រព្តឹត្តិឡើយ។​

ការប្រកួតបាល់ទាត់អន្តរជាតិ AFC Challenge League វគ្គផ្តាច់ព្រ័ត្រ រវាងព្រះខ័នរាជស្វាយរៀង និងក្រុម FC ARKADAG  ត្រូវធ្វើឡើងនៅពហុកីឡដ្ឋានជាតិមករតកតេជោ នៅម៉ោង៧យប់ ថ្ងៃទី១០​ ខែឧសភានេះ។ ការប្រកួតនេះ មានអ្នកចូលរួមទស្សនារហូតដល់ជាង៦ម៉ឺននាក់ ដែលនេះជាចំនួនច្រើនជាងគេ មិនធ្លាប់មានក្នុងប្រវិត្តិនៃការប្រកួតអន្តរជាតិពីមុនមកលើទឹកដីកម្ពុជា៕