អ្នកបោះឆ្នោតនៅប្រទេសស្លូវ៉ាគី អ៊ីតាលី និងប្រទេសសហភាពអឺរ៉ុប (EU) ផ្សេងទៀត កំពុង​នាំគ្នា​ទម្លាក់សន្លឹកឆ្នោតរបស់ពួកគេទៅក្នុងធុង នាថ្ងៃសៅរ៍ (ទី៨ ខែមិថុនា) នេះ ពោលគឺ​នៅ​ថ្ងៃទី៣ នៃ​ការបោះឆ្នោត ដើម្បីជ្រើសរើសសភាអឺរ៉ុប ដោយគណបក្សប្រជានិយម និងស្តាំ​ជ្រុល​និយម កំពុងសម្លឹងដល់ការទទួលបានផលល្អកាន់តែច្រើនឡើង នៅទូទាំងប្លុក ដែលមាន​សមាជិក ២៧ប្រទេសនេះ។

នៅស្លូវ៉ាគី ការបោះឆ្នោតនេះត្រូវបានគ្របដណ្ដប់​ដោយស្រមោល​នៃ​ការប៉ុនប៉ង​ធ្វើឃាត​លើ​នាយករដ្ឋ​​មន្ត្រី លោក Robert Fico កាលពីថ្ងៃទី១៥ ខែឧសភា ដោយហេតុការណ៍​នឹកស្មាន​មិន​ដល់​នោះ បានបង្កឲ្យមានអារម្មណ៍តក់ស្លុតពេញប្រទេស ដែលមានប្រជាជនចំនួន ៥,៤លាននាក់ និងបានកក្រើកពេញទ្វីបអឺរ៉ុប។ ក្រុមអ្នកវិភាគនិយាយថា ការវាយប្រហារ​នេះ​អាច​បង្កើន​ឱកាស​ឈ្នះឆ្នោត​ដល់គណបក្សឆ្វេងនិយមរបស់លោកនាយករដ្ឋមន្ត្រី គឺគណបក្ស Smer (ទិសដៅ) ដែលជា​ដៃគូដ៏សំខាន់នៅក្នុងរដ្ឋាភិបាលចម្រុះ ដែលកំពុងគ្រប់គ្រងប្រទេស។

លោក Fico ដែលចូលកាន់តំណែងកាលពីរដូវស្លឹកឈើជ្រុះឆ្នាំមុន បន្ទាប់ពីធ្វើយុទ្ធនាការ​លើ​គោល​នយោបាយ​គាំទ្ររុស្ស៊ី និងប្រឆាំងអាមេរិកនោះ បានជាសះស្បើយពីមុខរបួសច្រើនហើយ បន្ទាប់​ពី​រូបលោកត្រូវបានបាញ់ប្រហារចំត្រង់ពោះ អំឡុងពេលស្វាគមន៍អ្នកគាំទ្រនៅទីក្រុង Handlova។ លោកបានជាសះស្បើយទាន់ពេលវេលា ដើម្បីបាននិយាយទៅកាន់ប្រទេសជាតិ នៅក្នុង​វីដេអូដែលបានថតទុក ដែលជាសេចក្តីថ្លែងការណ៍ជាសាធារណៈលើកដំបូងរបស់លោក គិត​ចាប់តាំងពីការបាញ់ប្រហារនោះ ដោយមានរយៈពេលត្រឹមតែប៉ុន្មានម៉ោង នៅមុនកា​រ​ចាប់​ផ្តើម​នៃ​ថ្ងៃ​សមុនការបោះឆ្នោត កាលពីថ្ងៃពុធ។

ក្នុងសេចក្ដីថ្លែងការណ៍នោះ ទោះបីជាលោក Fico មិនបាននិយាយ​ដោយ​ផ្ទាល់​អំពី​ការ​បោះឆ្នោត​ក៏​ដោយ ​ក៏លោកបានវាយប្រហារ EU ដោយលើកឡើងថា លោកជាជនរង​គ្រោះដោ​យ​សារ​តែ​ទស្សនៈ​របស់​លោកខុសគ្នាដាច់ស្រឡះពីនិន្នាការរបស់អឺរ៉ុប។

នៅប្រទេសអ៊ីតាលី​ឯណោះវិញ ប្រជាពលរដ្ឋដែលមានអាយុចាប់ពី ១៨ឆ្នាំឡើងទៅ កំពុង​បោះឆ្នោត​ក្នុង​រយៈពេល ២ថ្ងៃ ដើម្បីបំពេញអាសនៈសភាអឺរ៉ុបចំនួន 76 ដោយ​ចាប់​ផ្តើម​ពី​ថ្ងៃសៅរ៍។ គេរំពឹងថា នាយករដ្ឋមន្ត្រី លោកស្រី Giorgia Meloni នឹងក្លាយជាអ្នកឈ្នះដ៏ធំ ដែលឆ្លុះបញ្ចាំងពីការរីកចម្រើនរបស់គណបក្សស្តាំជ្រុលនិយមរបស់លោកស្រី គឺគណបក្ស Fratelli d’Italia (បងប្អូនអ៊ីតាលី)។

ចំណែកអ្នកបោះឆ្នោត នៅប្រទេសឡាតវី ម៉ាល់តា និងសាធារណរដ្ឋឆែក ក៏កំពុងបោះឆ្នោត​នៅ​ថ្ងៃ​សៅរ៍​នេះផងដែរ។ លទ្ធផលចុងក្រោយនឹងមិនត្រូវបានចេញផ្សាយនោះឡើយ រហូតដល់យ​ប់​ថ្ងៃ​អាទិត្យ នៅពេលដែលប្រទេសនីមួយៗ បានបោះឆ្នោត។ ថ្ងៃបោះឆ្នោតសំខាន់ គឺថ្ងៃអាទិត្យ ដោយ​ពលរដ្ឋ ក្នុងប្រទេសអឺរ៉ុបចំនួន២០ រួមមានទាំងអាល្លឺម៉ង់ បារាំង និងប៉ូឡូញផងដែរ នឹងបោះឆ្នោត នៅក្នុងការបោះឆ្នោត ដើម្បីជ្រើសរើសសភាអឺរ៉ុបដែលមាន ៧២០អាសនៈ៕