ក្រុមហ៊ុនអាកាសចរណ៍បាននិយាយថា យន្តហោះ ហោះក្នុងស្រុកមួយគ្រឿង បានធ្លាក់នៅ​ជិត​ទីក្រុង Sao Paulo ប្រទេសប្រេស៊ីល កាលពីថ្ងៃសុក្រ បណ្តាលឲ្យមនុស្ស​ទាំងអស់​៦១​នា​ក់​នៅ​លើ​យន្ត​ហោះបានស្លាប់។ ក្រុមហ៊ុនអាកាសចរណ៍ក្នុងស្រុក Voepass បាននិយាយថា យន្តហោះ ធ្វើ​ដំណើរទៅកាន់អាកាសយានដ្ឋានអន្តរជាតិ Sao Paulo ហោះចេញពីទីក្រុង Cascavel ក្នុងរដ្ឋ Parana ធ្លាក់នៅម៉ោងប្រហែល ១:៣០នាទី រសៀលម៉ោងក្នុងតំបន់ នៅទីក្រុង Vinhedo មានចម្ងាយប្រហែល៨០គីឡូម៉ែត្រ ភាគពាយព្យទីក្រុង Sao Paulo ។

វីដេអូ ដែលបានចែករំលែកនៅលើបណ្តាញផ្សព្វផ្សាយសង្គម បានបង្ហាញឱ្យឃើញយន្តហោះ ATR-72 បានវិលគ្រប់គ្រងលែងបាន ហើយយន្តហោះបានធ្លាក់នៅជិតលំនៅឋានរបស់ប្រជាជន បន្ទាប់មកមានផ្សែងខ្មៅហុយចេញ។ លោក Daniel de Lima ជាអ្នករស់នៅក្បែរនោះ បាន​និយាយ​ថា លោកបានលឺសំឡេងខ្លាំងមួយ មុនពេលមើលទៅខាងក្រៅខុនដូរបស់លោក នៅពេល​នោះ លោកក៏បានឃើញយន្តហោះហោះកំពុងវិល នៅឆ្ងាយ។

លោកបានប្រាប់សារព័ត៌មានរ៉យទ័រថា «យន្តហោះកំពុងវិលប៉ុន្តែវាមិនទៅមុខនោះទេ»។ ភ្លាមៗនោះ យន្តហោះក៏បានធ្លាក់ ហើយផ្ទុះ។

មន្ត្រីទីក្រុង Valinhos បាននិយាយថា គ្មានអ្នកនៅរស់រានមានជីវិតនោះទេ ហើយលំ​នៅឋា​ន​មួយ​ខ្នង​នៅ​ក្នុងអគារខុនដូក្នុងស្រុក បានរងការខូចខាត ខណៈគ្មានអ្នកស្រុកណាម្នាក់រងរបួសឡើយ។ លោក de Lima និយាយថា លោកជឿជាក់ថា អាកាសយានិក បានព្យាយាមគេចចេញពីសង្កាត់ដែលនៅក្បែរនោះ ដែលមានប្រជាជនរស់នៅច្រើន។

អាជ្ញាធរ ពុំបាននិយាយភ្លាមៗពីអ្វីដែលបណ្តាលឱ្យ យន្តហោះធ្លាក់នោះទេ ទោះបីជាប្រធានមជ្ឈមណ្ឌលស៊ើបអង្កេតគ្រោះថ្នាក់អាកាសចរណ៍ប្រេស៊ីល បាននិយាយថា អ្វីដែលគេហៅថា «ប្រអប់ខ្មៅ» របស់យន្តហោះដែលមានការថតសំឡេង និងទិន្នន័យហោះហើរ ត្រូវបានរកឃើញពីទីកន្លែងនោះក៏ដោយ។

វីដេអូនៃការធ្លាក់យន្តហោះ បានបង្ហាញពីអាកាសធាតុស្រលះ ដោយការព្យាករណ៍សម្រាប់តំបន់នេះនិយាយថាមានភ្លៀងធ្លាក់តិច និងខ្យល់បក់ក្នុងល្បឿន១០គីឡូម៉ែត្រក្នុងមួយម៉ោង ។