ថ្លែង​ក្នុង​សន្និសីទ​សារព័ត៌មាន​ក្នុង​ទីក្រុង​ហ្សាការតា អ្នក​នាំ​ពាក្យ​អគ្គនាយកដ្ឋាន​គយ និង​រដ្ឋករ លោក Nirwala Dwi Heryanto គម្រោងនេះនឹងចាប់ផ្ដើមអនុវត្តក្នុងពាក់កណ្ដាលឆ្នាំ​ ២០២៥។

លោកបញ្ជាក់ថា គោលការណ៍ថ្មីនេះ មិនត្រូវបានបង្កើតឡើងដើម្បីរកប្រាក់ចំណូលបន្ថែមចូលរដ្ឋទេ ពោល គឺដើម្បីកាត់បន្ថយការប្រើប្រាស់ជាតិស្ករ អំឡុងពេលដែលបច្ចុប្បន្ន ករណីជំងឺទឹកនោមផ្អែមកើនឡើងជាបន្តបន្ទាប់។ ការដាក់ពន្ធ ត្រូវបានរៀបចំឡើង ដើម្បីគ្រប់គ្រងលើការប្រើប្រាស់ជាតិស្ករលើសចំណុះ។

តាមទិន្នន័យពីក្រសួងសុខាភិបាល ក្នុងអំឡុងពេល ១០ ឆ្នាំចុងក្រោយ អត្រានៃជំងឺទឹកនោមផ្អែមនៅឥណ្ឌូនណេស៊ី បានកើនឡើងទ្វេដងរហូតដល់ ១០ភាគរយ ដែលអ្នកកើតជំងឺនេះ ២៨លាននាក់ ក្នុងចំណោមប្រជាជនសរុបក្នុងប្រទេស ២៨០ លាននាក់។

អនុរដ្ឋមន្ត្រីក្រសួងសុខាភិបាល លោក Dante Saksono Harbuwono បានកត់សម្គាល់ឃើញថា​ ប្រជាជន ២៨,៧ ភាគរយបានបរិភោគជាតិស្ករ និងអំបិល​ច្រើនលើសចំណុះ ក្នុងពេលតែមួយ ៩៥,៥ ភាគរយ មិនទទួលទានបន្លែផ្លែឈើបានគ្រប់គ្រាន់ និង ៣៥,៥ ភាគរយមិនធ្វើចលនាបានគ្រប់គ្រាន់។ ទម្លាប់មិនល្អទាំងនេះនឹងបណ្ដាលឲ្យមានជំងឺផ្សេងៗជាច្រើន ជាពិសេសទឹកនោមផ្អែម។

លោក Dante ប្រកាសនៅក្នុងវេទិកាគោលនយោបាយសុខភាពនៅទីក្រុងហ្សាការតាថា ភេសជ្ជៈមានជាតិស្ករជាហេតុបង្កដ៏ធំដែលឆ្ពោះទៅរកជំងឺមិនឆ្លងដូចជាទឹកនោមផ្អែម និងភាពធាត់ជាដើម។ ការដាក់ពន្ធលើភេសជ្ជៈផ្អែមជាដំណោះស្រាយមួយដែលអាចកាត់បន្ថយការកើនឡើងករណីទាំងនោះបាន។

ការសម្របសម្រួលរវាងក្រសួងសុខាភិបាល និងក្រសួងហិរញ្ញវត្ថុ កំពុងបន្តសម្រេចនូវបទប្បញ្ញត្តិចុងក្រោយក្នុងការអនុវត្ត។ ការដាក់ពន្ធគឺអាស្រ័យទៅតាមកម្រិតជាតិស្ករ ការផលិតឡើង និងលើលក្ខណៈវិនិច្ឆ័យផ្សេងទៀតដើម្បីកំណត់អត្រាអនុវត្តនៃភេសជ្ជៈនីមួយៗ។

រដ្ឋាភិបាលឥណ្ឌូណេស៊ី បានរំពឹងថានឹងរកបាន ៣៨៥,២៤ លានដុល្លារពីពន្ធភេសជ្ជៈផ្អែមថ្មីនេះ ត្រូវបានគ្រប់គ្រងដោយបទបញ្ជារបស់រដ្ឋាភិបាល (PP) លេខ ២៨/២០២៤ និងបទប្បញ្ញត្តិនេះក៏ជាផ្នែកមួយដែលមានចែងក្នុងច្បាប់ទី ១៧/២០២៣ ស្តីពីសុខភាព។

តាមសេដ្ឋវិទូមកពីសាកលវិទ្យាល័យឥណ្ឌូណេស៊ី លោកស្រី Telisa Aulia Falianty សំណើផ្សេងៗត្រូវបានធ្វើឡើងទាក់ទងនឹងអត្រាពន្ធ។ ទីភ្នាក់ងារគណនេយ្យភាពហិរញ្ញវត្ថុរដ្ឋ (BAKN) នៃសភាតំណាងរាស្រ្តបានណែនាំឲ្យដាក់អត្រាពន្ធ ២,៥ ភាគរយ ខណៈពេលដែលរដ្ឋាភិបាលបានស្នើឡើងជាមួយនឹងអត្រាថេរ ០,០៩២ ដុល្លារក្នុងមួយលីត្រលើភេសជ្ជៈដែលមានជាតិស្ករដូចជាទឹកតែដប និងភេសជ្ជៈប៉ូវកម្លាំង និង​ ០,១៥​ ដុល្លារលើប្រភេទស៊ីរ៉ូ។

បទប្បញ្ញត្តិបច្ចុប្បន្នកំពុងនៅដំណាក់កាលចុងក្រោយដែលត្រូវបានត្រួតពិនិត្យដោយភាគីពាក់ព័ន្ធ ដើម្បីធានាការអនុវត្តដំណើរការដោយរលូន។ លោក​ Dante បន្ថែមថា ការសិក្សាត្រូវបានបញ្ចប់ហើយ និងត្រៀមរួចរាល់ដើម្បីអនុវត្តគោលនយោបាយនៅឆ្នាំនេះ នៅពេលដែលហត្ថលេខាត្រូវបានចុះ៕