បើតាមសៀវភៅសង្ខេបថវិកាប្រចាំឆ្នាំ២០២៥ ចេញផ្សាយដោយក្រសួងសេដ្ឋកិច្ច និងហិរញ្ញវត្ថុ​ ថវិកាដែលក្រសួងទេសចរណ៍ទទួលបានជាង២៣,៧លានដុល្លារនេះ គឺមាន១៦,៨៦៤.៤លានរៀល (ប្រមាណជិត៤,២លានដុល្លារ) យកទៅគ្រប់គ្រង និងបង្កើនកិ្តតិនាមទេសចរណ៍ និងការអភិវឌ្ឍទេសចរណ៍។​ ក្នុងនោះ មានការពង្រីកកិច្ចសហប្រតិបត្តិការទេសចរណ៍ និងសម្រួលការធ្វើដំណើរទេសចរណ៍ប្រមាណ៥០ម៉ឺនដុល្លារ, ការផ្សព្វផ្សាយទេសចរណ៍កម្ពុជាទៅកាន់ទីផ្សារក្នុងស្រុក ក្រៅប្រទេស​ និងគ្រប់គ្រងកិ្តតិនាមទេសចរណ៍កម្ពុជា​ប្រមាណ១,៧លានដុល្លារ និងការរៀបចំផែនការអភិវឌ្ឍន៍ផលិតផលទេសចរណ៍ អេកូទេសចរណ៍ និងការបង្កើនភាពទាក់ទាញទេសចរណ៍មានប្រមាណ៨៥ម៉ឺនដុល្លារ។ 

ចំពោះការបង្កើនប្រសិទ្ធភាពនៃការផ្សព្វផ្សាយឧស្សាហកម្មទេសចរណ៍ និងកិត្តិនាមកម្ពុជា និងភាពជាដៃគូជាមួយផ្នែកឯកជន​ រដ្ឋក៏ត្រៀមប្រើប្រាស់ថវិកាប្រមាណ៧០ម៉ឺនដុល្លារ។ សម្រាប់ការអនុវត្តកម្មវិធីអភិវឌ្ឍធនធាន និងគោលដៅទាក់ទាញទេសចរណ៍ប្រចាំឆ្នាំ២០២៥​ មានក្នុងទំហំទឹកប្រាក់ប្រមាណ៩៦ម៉ឺនដុល្លារ និងកម្មវិធីគ្រប់គ្រងស្ថាប័ន រួមទាំងសេវាគាំទ្រទូទៅ គឺមានជាង១៨,៥លានដុល្លារ​។​

ក្នុងឆ្នាំ២០២៤ កម្ពុជា​ទទួលបានភ្ញៀវទេសចរអន្តរជាតិជាង៦,៧ លាននាក់ ​កើន ២២,៩ ភាគរយ ធៀបនឹងឆ្នាំ២០២៣។ ទេស​ចរ​បរទេស ដែលមកលេងកម្ពុជា​​ច្រើនជាងគេ គឺជនជាតិថៃ វៀតណាម ចិន ឡាវ និងអាម៉េរិក។ នេះជារបាយការណ៍ដែលបង្ហាញដោយលោក ហួត ហាក់ រដ្ឋមន្ត្រីក្រសួងទេសចរណ៍នៅក្នុងពិធីផ្សព្វផ្សាយស្តីពី «ការលើកកម្ពស់វិស័យទេសចរណ៍ និងការប្រឆាំងព័ត៌មានក្លែងក្លាយ»។

កាលពីថ្ងៃទី១៥ ខែមករា ឆ្នាំ២០២៥ ក្រសួងទេសចរណ៍ បានសហការជាមួយក្រសួងព័ត៌មាន  ដើម្បី ផ្សព្វផ្សាយ​ និងលើកកម្ពស់សក្តានុពលវិស័យទេសចរណ៍របស់កម្ពុជា និងការប្រឆាំងព័ត៌មានក្លែងក្លាយ ក្រោមប្រធានបទ «ម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់ និងប្រឆាំងព័ត៌មានក្លែងក្លាយ» ។ ការណ៍នេះ សំដៅបង្ការ ទប់ស្កាត់ការផ្សព្វផ្សាយព័ត៌មានក្លែងក្លាយ បង្កាច់បង្ខូចកេរ្តិ៍ឈ្មោះកម្ពុជា និងលើកកម្ពស់ការផ្សព្វផ្សាយព័ត៌មានពិត ផ្តល់សុវត្ថិភាព និងភាពជឿជាក់ដល់សាធារណជន និងទេសចរអន្តរជាតិដែលមានបំណងមកទស្សនាកម្សាន្តនៅកម្ពុជា ក៏ដូចជាទាក់ទាញទេសចរមកទស្សនាកម្ពុជាកាន់តែច្រើនឡើង៕