យោងតាមសន្ទស្សន៍គុណភាពខ្យល់ (AQI) កំហាប់ភាគល្អិតនិចល (PM2.5) នៅក្នុងខេត្តសៀមរាបកើនខ្ពស់ជាងគេ គឺ ២៩០ ខណៈនៅខេត្តពោធិ៍សាត់ កំហាប់ PM2.5 ស្ថិតនៅលេខ២៥០។ ខេត្តបន្ទាយមានជ័យមាន កំហាប់ PM2.5 ចំនួន ២៣៩ ខណៈកោះកុង មានកំហាប់ PM2.5 ចំនួន ២០៨។

ក្រៅពីនេះ បណ្តាខេត្តមួយចំនួនដូចជាបាត់ដំបង កំពង់ធំ ស្ទឹងត្រែង ប៉ៃលិន និងខេត្តឧត្តរមានជ័យ មានសន្ទស្សន៍គុណភាពខ្យល់ (AQI) ស្ថិតនៅក្នុងកម្រិតពណ៌លឿន ដែលជាកម្រិត​បំពុលស្រាល។ សន្ទស្សន៍គុណភាពខ្យល់ បណ្តាខេត្តផ្សេងទៀត គឺស្ថិតនៅកម្រិតពណ៌បៃតង និងខៀវ ដែលជាកម្រិតល្អ។
ទោះយ៉ាងណា ដើម្បីការការពារសុខភាព បណ្តាលមកពីការប្រែប្រួលគុណភាពខ្យល់ក្នុងបរិយាកាស ក្រសួងបរិស្ថាន បានណែនាំឱ្យមនុស្សគ្រប់គ្នា ស្នាក់នៅក្នុងផ្ទះ ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ (ពណ៌ក្រហម) ឬខ្ពស់ខ្លាំង (ពណ៌ស្វាយ) ឬបរិយាកាសអ័ព្ទអួ ដោយសារកំហាប់សារធាតុបំពុលខ្យល់កើនឡើង។

ត្រូវបិទបង្អួច និងទ្វារ ដើម្បីបង្ការខ្យល់មិនល្អពីខាងក្រៅចូលក្នុងផ្ទះរបស់លោកអ្នក កាត់បន្ថយសកម្មភាពខាងក្រៅផ្ទះ ឬនៅទីវាល ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ និងខ្ពស់ខ្លាំង ឬពាក់ម៉ាសដែលអាចទប់ស្កាត់ភាគល្អិតនិចល PM2.5 ក្នុងករណីចាំបាច់។

បរិភោគទឹកឱ្យបានគ្រប់គ្រាន់ និងត្រូវយកចិត្តទុកដាក់ការពារ ជាពិសេសចំពោះ ទារក កុមារ ស្ត្រីមានផ្ទៃពោះ ជនចាស់ជរា អ្នកមានជំងឺសួត ជំងឺសរសៃឈាមបេះដូង និងជំងឺរ៉ាំរ៉ៃ ដែលជាក្រុមងាយរងគ្រោះ។ ករណីមានរោគសញ្ញា ផ្លូវដង្ហើមដូចជា ពិបាកដកដង្ហើម ក្អក ហត់ សូមលោកអ្នកប្រញាប់ទៅកាន់ មណ្ឌលសុខភាព ឬមន្ទីរពេទ្យដែលនៅជិតផ្ទះ៕