មគ្គុទ្ទេសក៍ទេសចរណ៍ភាសាអង់គ្លេស លោក យ៉ា ណុប បាមបង្ហាញសុទិដ្ឋិនិយម និងយល់ថា ការរៀបចំកម្រាលរានទស្សនាថ្មីនេះ សម្រួលដល់ការទស្សនាពិសេសការផ្តិតរូបភាព និង វីដេអូសម្រាប់ភ្ញៀវទេសចរ។ ទេសចរ កម្ររំលងការថតរូបនៅទីនេះណាស់។

លោក យ៉ា ណុប បន្តថា ការរៀបចំបែបនេះជួយឱ្យទេសចរថតរូបភាពស្អាតៗបន្ថែម ដែលកន្លងមក ជាដីរាប និងពិបាកឈរថត នៅពេលទឹកឡើងខ្ពស់នារដូវភ្លៀង។ ម្យ៉ាងទៀត វាអាចទាក់ទាញទេសចរជាតិ និងអន្តរជាតិ ចូលមកទស្សនាប្រាសាទអង្គរវត្ត កាន់តែច្រើន។ នេះជាការយល់ឃើញរបស់មគ្គុទ្ទេសក៍រូបនេះ។

បើតាមការចុះផ្សាយរបស់អាជ្ញាធរជាតិអប្សារា កម្រាលរានទស្សនានៅមាត់ស្រះទឹកអង្គរខាងត្បូង មានទំហំ៦ម៉ែត្រ គុណ១២ម៉ែត្រ ដោយចូលរួមសហការពីភ្នាក់ងារបេតិកភណ្ឌវប្បធម៌កូរ៉េ (KHA)។ អាជ្ញាធរបញ្ជាក់ថា នៅរដូវវស្សាស្រះ មានទឹកច្រើន ដូចជាបែកសាចចេញពីស្រះ បង្កការលំបាកក្នុងការផ្តិតយករូបភាពស្អាតៗចេញពីផ្ទៃទឹក។ ទេសចរនិយមថតរូបដែលមានកំពូលប្រាសាទ ឆ្លុះលើផ្ទៃទឹក៕