តាមប្រភពពីសារព័ត៌មាន Bloomberg នៅក្នុងសេណារីយ៉ូនៃការលក់បន្តនោះ បណ្តាញទំនាក់ទំនងសង្គម X របស់មហាសេដ្ឋី អេឡុន ម៉ាសក៍ នឹងកាន់កាប់ TikTok នៅអាម៉េរិក ដោយរួមគ្នាគ្រប់គ្រងប្រតិបត្តិការអាជីវកម្ម។ យ៉ាងណាក៏ដោយ មន្ត្រីចិនមិនទាន់ឈានដល់ការឯកភាពជាក់លាក់មួយអំពីរបៀបអនុវត្តកិច្ចព្រមព្រៀងនេះទេ។

មក​ដល់​ពេល​នេះ ការ​ពិភាក្សា​ស្ថិត​ក្នុង​ដំណាក់​កាល​បឋម។ ទីក្រុងប៉េកាំងនៅតែផ្តល់អាទិភាពដល់ TikTok ដែលនៅសេសសល់ក្រោមការគ្រប់គ្រងរបស់ក្រុមហ៊ុនមេ Bytedance។

TikTok បដិសេធ​មិន​ធ្វើ​អត្ថាធិប្បាយ​ទេ ខណៈលោកអេឡុន ម៉ាសក៍ ក៏នៅ​មិន​ទាន់​ឆ្លើយ​តប​ដែរ។ រដ្ឋបាលចិន Cyberspace និងក្រសួងពាណិជ្ជកម្មចិន ដែលប្រហែលជាពាក់ព័ន្ធនឹងការសម្រេចចិត្តអំពីអនាគតរបស់ TikTok ក៏មិនបានលើកឡើងអ្វីដែរ។

នៅខែមេសា ឆ្នាំ២០២៤ លោកប្រធានាធិបតី ចូ បៃឌិន​ បានចុះហត្ថលេខាលើច្បាប់ដែលទាមទារ ByteDance ក្រុមហ៊ុនមេរបស់ TikTok ដើម្បីលក់ប្រតិបត្តិការរបស់កម្មវិធីនៅអាម៉េរិកមុនថ្ងៃទី ១៩ ខែមករា បើមិនដូច្នេះទេវានឹងត្រូវបានហាមឃាត់ក្នុងទឹកដីអាម៉េរិក។

TikTok និង ByteDance ក្រោយទទួលបានពាក្យបណ្តឹងបានអះអាងថា វារំលោភលើសិទ្ធិធ្វើវិសោធនកម្មលើកទីមួយក្នុងការនិយាយដោយសេរី។ បណ្តាញសង្គមនេះមានអ្នកប្រើប្រាស់ប្រហែល ១៧០លាននាក់នៅអាម៉េរិក។

នៅថ្ងៃទី៦ ខែធ្នូ ឆ្នាំ២០២៤ តុលាការឧទ្ធរណ៍ DC (តុលាការសហព័ន្ធនៃសាលាឧទ្ធរណ៍សម្រាប់ស្រុក Columbia ដែលជាតុលាការមួយក្នុងចំណោមតុលាការឧទ្ធរណ៍សហព័ន្ធចំនួន ១៣នៅអាម៉េរិក) បានច្រានចោលបណ្តឹងរបស់ TikTok ។ ពួកគេបានសន្និដ្ឋានថា រដ្ឋាភិបាលបានធ្វើសកម្មភាពដើម្បីការពារសេរីភាពនៃការបញ្ចេញមតិពីប្រទេសបរទេសដែលមានអរិភាព និងកំណត់លទ្ធភាពនៃទិន្នន័យស្តីពីជនជាតិអាម៉េរិកដែលត្រូវបានប្រមូល៕