នៅក្នុងសេចក្តីថ្លែងការណ៍មួយ សហភាពអឺរ៉ុបបានប្រកាសថា ជំនួយនឹងផ្តោតលើតំបន់ដែលរងគ្រោះខ្លាំងដោយវិបត្តិ រួមទាំងតំបន់មជ្ឈិមបូព៌ា ជាពិសេសតំបន់កាហ្សា ស៊ីរី អ៊ុយក្រែន អាហ្រ្វិក អាម៉េរិកឡាទីន និងតំបន់ការាបៀន ក៏ដូចជាអាស៊ីប៉ាស៊ីហ្វិក។

គណៈកម្មការអឺរ៉ុបសង្កត់ធ្ងន់ថា ជំនួយនេះនឹងត្រូវបានបំប្លែងទៅជាការផ្គត់ផ្គង់ ឱសថ ឬការផ្គត់ផ្គង់ផ្សេងទៀត តាមរយៈអង្គការមនុស្សធម៌ជាដៃគូ ដូចជាអង្គការមិនមែនរដ្ឋាភិបាល និងទីភ្នាក់ងារជាតិ ក៏ដូចជាទីភ្នាក់ងារឯកទេសក្នុងចំណោមរដ្ឋជាសមាជិក។
ជាក់ស្តែង ទឹកប្រាក់ជិត ៥០០លានអឺរ៉ូ (៥១៤លានដុល្លារ) នឹងត្រូវបែងចែកទៅតំបន់មជ្ឈិមបូព៌ា និងអាហ្វ្រិកខាងជើង។ ជិត ១៥០លានអឺរ៉ូ (១៥៤លានដុល្លារ) នឹងទៅជួយអ៊ុយក្រែន។ ជាង ៥១០លានអឺរ៉ូ (៥២៥លានដុល្លារ) នឹងទៅតំបន់អាហ្វ្រិកផ្សេងទៀតដូចជា តំបន់ Sahel ភាគខាងលិច និងអាហ្វ្រិកកណ្តាល។

ចំណែក ១១៣លានអឺរ៉ូ (១១៦លានដុល្លារ) សម្រាប់អាម៉េរិកឡាទីន និងការាបៀន។ ជាចុងក្រោយ ថវិកាជាង ២០០លានអឺរ៉ូនឹងត្រូវផ្តោតលើសកម្មភាពជំនួយមនុស្សធម៌នៅមីយ៉ាន់ម៉ា និងបង់ក្លាដែស ក៏ដូចជាលើវិបត្តិនៅអាហ្វហ្គានីស្ថានដែរ។

ស្នងការអឺរ៉ុបទទួលបន្ទុកគ្រប់គ្រងវិបត្តិ លោកស្រី Hadja Lahbib បានបញ្ជាក់ថា សហភាពអឺរ៉ុបបន្តបំពេញការប្តេជ្ញាចិត្តរបស់ខ្លួន ដើម្បីគាំទ្រដល់អ្នកដែលត្រូវការជំនួយបំផុត។ ចំនួននេះត្រូវបានគេប៉ាន់ប្រមាណថាមានច្រើនជាង ៣០០លាននាក់ក្នុងឆ្នាំ២០២៥។ ហើយដើម្បីអាចធ្វើដូច្នេះបាន លោកស្រី Lahbib បានសម្តែងក្តីរំពឹងថា រដ្ឋាភិបាលចាំបាច់ត្រូវគោរពច្បាប់មនុស្សធម៌អន្តរជាតិ និងបង្កើតលក្ខខណ្ឌសុវត្ថិភាពសម្រាប់អង្គការសង្គ្រោះអាចទៅដល់ប្រជាជននៅក្នុងតំបន់ដែលងាយរងគ្រោះ។

កាលពីថ្ងៃទី ១៦ ខែមករា សហភាពអឺរ៉ុបបានបន្តប្រកាសកញ្ចប់ជំនួយសង្គ្រោះបន្ទាន់ចំនួន ១២០ លានអឺរ៉ូ (១២៤ លានដុល្លារ) សម្រាប់តំបន់កាហ្សា។ រហូតមកដល់ពេលនេះ សហភាពអឺរ៉ុបបានផ្តល់ជំនួយសរុបចំនួន ៤៥០លានអឺរ៉ូ (៤៦៣លានដុល្លារ) ដែលស្មើនឹងទំនិញចំនួន ៣៨០០តោន ដែលត្រូវបានដឹកជញ្ជូនទៅកាន់តំបន់កាហ្សា ដើម្បីផ្គត់ផ្គង់ដល់ប្រជាជនប៉ាឡេស្ទីន៕